ಜನಸ್ಪಂದನ ನ್ಯೂಸ್, ಬೀದರ್ (ಬಸವಕಲ್ಯಾಣ): ಗಂಡ ಪ್ರತಿದಿನ ರಾತ್ರಿ ತಡವಾಗಿ ಮನೆಗೆ ಬರುತ್ತಿದ್ದ ಕಾರಣದಿಂದ ಮನನೊಂದಿದ್ದ 22 ವರ್ಷದ ಯುವ ಗೃಹಿಣಿಯೊಬ್ಬರು ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಹೃದಯವಿದ್ರಾವಕ ಘಟನೆ ಬೀದರ್ ಜಿಲ್ಲೆಯ ಬಸವಕಲ್ಯಾಣ ನಗರದಲ್ಲಿ ನಡೆದಿದೆ.
ಈ ಪ್ರಕರಣಕ್ಕೆ ಸಂಬಂಧಿಸಿ ಮೃತಳ ಪೋಷಕರು, ಗಂಡ ಹಾಗೂ ಅತ್ತೆ-ಮಾವನ ವಿರುದ್ಧ ಮಾನಸಿಕ ಕಿರುಕುಳ ಆರೋಪಿಸಿ ದೂರು ದಾಖಲಿಸಿದ್ದು, ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.
ಬಸವಕಲ್ಯಾಣದ ಓಂ ನಗರ (ಓಂ ಶಕ್ತಿ ನಗರ) ಪ್ರದೇಶದಲ್ಲಿ ಈ ದುರ್ಘಟನೆ ಸಂಭವಿಸಿದೆ. ಆತ್ಮಹತ್ಯೆಗೆ ಶರಣಾದ ಯುವತಿ ಅಂಜನಾಬಾಯಿ ಪಾಟೀಲ್ (22) ಎಂದು ಗುರುತಿಸಲಾಗಿದೆ. 10 ತಿಂಗಳ ಪುಟ್ಟ ಮಗುವನ್ನು ಬಿಟ್ಟು ಅಂಜನಾಬಾಯಿ ಪ್ರಾಣ ಕಳೆದುಕೊಂಡಿರುವುದು ಕುಟುಂಬ ಹಾಗೂ ಸ್ಥಳೀಯರಲ್ಲಿ ತೀವ್ರ ನೋವುಂಟುಮಾಡಿದೆ.
ಗಂಡನ ರಾತ್ರಿ ವ್ಯಾಪಾರವೇ ಗೃಹಿಣಿ ಆತ್ಮಹತ್ಯೆಗೆ ಕಾರಣ?
ಮೃತ ಅಂಜನಾಬಾಯಿ ಪಾಟೀಲ್ ಅವರು ಮೂರು ವರ್ಷಗಳ ಹಿಂದೆ ಬಸವಕಲ್ಯಾಣ ನಿವಾಸಿ ಶೇಖರ್ ಎಂಬವರೊಂದಿಗೆ ವಿವಾಹವಾಗಿದ್ದರು. ಶೇಖರ್ ನಗರದಲ್ಲಿ ಪಾನಿಪುರಿ ವ್ಯಾಪಾರ ನಡೆಸುತ್ತಿದ್ದು, ವ್ಯಾಪಾರ ರಾತ್ರಿ ಹೊತ್ತುವರೆಗೂ ನಡೆಯುತ್ತಿದ್ದ ಕಾರಣದಿಂದ ಅವರು ಪ್ರತಿದಿನ ತಡವಾಗಿ ಮನೆಗೆ ವಾಪಸ್ಸಾಗುತ್ತಿದ್ದರು ಎಂದು ತಿಳಿದುಬಂದಿದೆ.
ಈ ಕ್ರೈಂ ಸುದ್ದಿ ಓದಿ : ಕರ್ನಾಟಕ ಮೂಲದ ಒಂದೇ ಕುಟುಂಬದ 4 ಮಂದಿ ಬಿಹಾರದಲ್ಲಿ ಆತ್ಮಹತ್ಯೆ.!
ಗಂಡ ಮನೆಗೆ ಬೇಗ ಬರಬೇಕೆಂದು ಅಂಜನಾಬಾಯಿ ಪದೇಪದೇ ಮನವಿ ಮಾಡುತ್ತಿದ್ದಳಂತೆ. ಆದರೆ ಪಾನಿಪುರಿ ವ್ಯಾಪಾರ ರಾತ್ರಿವರೆಗೂ ನಡೆಯುವುದರಿಂದ ಬೇಗ ಮನೆಗೆ ಬರಲು ಸಾಧ್ಯವಿಲ್ಲ, ಈ ವಿಚಾರಕ್ಕೆ ಹೊಂದಾಣಿಕೆ ಮಾಡಿಕೊಂಡು ಹೋಗಬೇಕೆಂದು ಶೇಖರ್ ಹೇಳುತ್ತಿದ್ದರೆಂಬ ಮಾಹಿತಿ ಲಭ್ಯವಾಗಿದೆ.
ಅತ್ತೆ-ಮಾವರಿಂದಲೂ ಮಾನಸಿಕ ಕಿರುಕುಳ ಆರೋಪ :
ಗಂಡ ಮನೆಗೆ ತಡವಾಗಿ ಬರುವ ವಿಚಾರವಾಗಿ ಉಂಟಾದ ಕಲಹದ ಹಿನ್ನೆಲೆಯಲ್ಲಿ ಅತ್ತೆ-ಮಾವ ಕೂಡ ಅಂಜನಾಬಾಯಿಗೆ ಮಾನಸಿಕ ಕಿರುಕುಳ ನೀಡಿದ್ದಾರೆ ಎಂಬ ಆರೋಪ ಕೇಳಿ ಬಂದಿದೆ. “ಪಾನಿಪುರಿ ವ್ಯಾಪಾರ ರಾತ್ರಿವರೆಗೂ ನಡೆಯುತ್ತದೆ, ನೀನು ಇದಕ್ಕೆ ಹೊಂದಿಕೊಳ್ಳಬೇಕು” ಎಂದು ಅತ್ತೆ-ಮಾವ ಜಗಳವಾಡುತ್ತಿದ್ದರೆಂಬ ಆರೋಪವನ್ನು ಮೃತಳ ಕುಟುಂಬ ಮಾಡಿದೆ.
ಈ ನಿರಂತರ ಜಗಳ ಹಾಗೂ ಮಾನಸಿಕ ಒತ್ತಡದಿಂದ ಅಂಜನಾಬಾಯಿ ತೀವ್ರವಾಗಿ ನೊಂದಿದ್ದಳು ಎಂದು ತಿಳಿದುಬಂದಿದೆ. ಈ ಕುರಿತು ಆಕೆ ತನ್ನ ಪೋಷಕರ ಬಳಿ ಹಲವು ಬಾರಿ ಅಳಲು ತೋಡಿಕೊಂಡಿದ್ದಳು ಎನ್ನಲಾಗಿದೆ.
ಪೋಷಕರಿಂದ ದೂರು, ಮೂವರ ವಿರುದ್ಧ ಎಫ್ಐಆರ್ :
ಅಂಜನಾಬಾಯಿ ಆತ್ಮಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿ ಮೃತಳ ಪೋಷಕರು ಗಂಡ ಶೇಖರ್, ಅತ್ತೆ ಅರುಣಾಬಾಯಿ, ಮಾವ ಚಂದ್ರಕಾಂತ್ ವಿರುದ್ಧ ಮಾನಸಿಕ ಕಿರುಕುಳದ ದೂರು ದಾಖಲಿಸಿದ್ದಾರೆ. ಈ ದೂರಿನ ಆಧಾರದಲ್ಲಿ ಬಸವಕಲ್ಯಾಣ ನಗರ ಪೊಲೀಸ್ ಠಾಣೆಯಲ್ಲಿ ಮೂವರ ವಿರುದ್ಧ ಎಫ್ಐಆರ್ ದಾಖಲಾಗಿದೆ.
ತನಿಖೆ ಚುರುಕು, ಶವ ಮರಣೋತ್ತರ ಪರೀಕ್ಷೆಗೆ ರವಾನೆ :
ಘಟನೆಯ ಮಾಹಿತಿ ಪಡೆದ ತಕ್ಷಣ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ಸರ್ಕಾರಿ ಆಸ್ಪತ್ರೆಗೆ ರವಾನಿಸಲಾಗಿದೆ. ಸ್ಥಳೀಯರು ಹಾಗೂ ಕುಟುಂಬಸ್ಥರಿಂದ ಮಾಹಿತಿ ಸಂಗ್ರಹಿಸಿ ಪೊಲೀಸರು ಪ್ರಕರಣದ ಎಲ್ಲ ಆಯಾಮಗಳಿಂದ ತನಿಖೆ ನಡೆಸುತ್ತಿದ್ದಾರೆ.
ಇದನ್ನು ಓದಿ : ಸೊಲ್ಲಾಪುರದಲ್ಲಿ 17ನೇ ಮಹಡಿಯಿಂದ ಜಿಗಿದ ಉದ್ಯಮಿ; ವಿಡಿಯೋ ವೈರಲ್.
ಕೌಟುಂಬಿಕ ಕಲಹ, ಮಾನಸಿಕ ಒತ್ತಡ ಹಾಗೂ ಗೃಹಜೀವನದ ಸಮಸ್ಯೆಗಳು ಯುವತಿಯ ಆತ್ಮಹತ್ಯೆಗೆ ಕಾರಣವೇ ಎಂಬುದನ್ನು ಪೊಲೀಸರು ತನಿಖೆಯ ಮೂಲಕ ಖಚಿತಪಡಿಸಿಕೊಳ್ಳಲಿದ್ದಾರೆ.
Courtesy : Suvarna News
Disclaimer : ಈ ಸುದ್ದಿಯಲ್ಲಿ ಉಲ್ಲೇಖವಾಗಿರುವ ಆತ್ಮಹತ್ಯೆ ಘಟನೆ ಸಮಾಜದಲ್ಲಿ ಜಾಗೃತಿ ಮೂಡಿಸುವ ಉದ್ದೇಶದಿಂದ ಪ್ರಕಟಿಸಲಾಗಿದ್ದು, ಯಾರನ್ನೂ ಪ್ರೇರೇಪಿಸುವ ಉದ್ದೇಶವಿಲ್ಲ. ಮಾನಸಿಕ ಒತ್ತಡ ಅನುಭವಿಸುವವರು ಸಮೀಪದ ಸಹಾಯವಾಣಿ ಅಥವಾ ತಜ್ಞರ ನೆರವು ಪಡೆಯಬೇಕು.
